Versione desktop / mobile

POESIA SU BORDIGHERA: SANT' AMPEIU

Statistiche
     
 

SANT'AMPEIU

 
     
     
 

Se ti vai a Burdighea

burdezandu sci a marina 

ti trovi sc'ina scuiera

 ina geixia pecenina.

In sce a storia du Paise 

u se leze ancura avù 

che Ampeiu da burasca

u l'à sarvau u Sefbù.

E i antighi burdigoti

in segnu de devussion

stu munumèntu de Fede 

i gh'an faitu cun pasciun.

A l'è stà ina couza vera 

l'è da tuti diciarà

alantù a pupulassiun 

 l'è restà alabeà.

L'è di seculi, o geixeta, 

che ti stai delongu in pei: 

ma nu sulu i burdigoti 

i t'ama ascì i furustei.

U ciocu de campane

cand'i sona u matutin 

tute e gènte i u sènte

perchè bèlu e argentin.

Sant'Ampeiu, ti sei in Santu 

che de grassie ti n'ai fau

e u l'è pè ricunuscensa

chi te an delongu amau.

A matin, spuntandu u sù

u te baixia u campanin: 

tu, geixeta in riva au mà,

ti sai tuta de sarin.

Candu a luna a brila in cielu

a pà d'argèntu a marina: 

mi a cuntemplu u tò prufilu 

cu te fà tantu cuchina.

Cheli antighi marinai 

che sce schune navigaiva 

t'aregordi Sant'Ampeiu

canti vuti te purtaiva?

Oh, geixeta belurina, 

ch'a te portu in tu mei co

i son ciù de otant'agni: 

de cand'eiru ancù fio.

Burdighea, sitadina

pu tò clima rinumà:

u furèstu  s'inamura

cande u gh'è a sugiurnà.

E tò parme e passeggiate

e tò sciure, u tò sù, 

ti sei propriu in Paradiisu: 

ti sei tèra du Segnù.

Sant'Ampeiu lì sciu scoiu

atacau cum'a patela

garda i rairi burdigoti

e cummossu poi parpela.

A Regina Margherita 

li pè contru assetà

goude cande i burdigoti

 i ven inta geixia a pregà.

Cande st vei pescaui 

i andeixeiva a pescà

faixeiva riferimèntu 

a tò geixia in riva au mà.

E i diixeiva a Sant'Ampeiu:

fane di pesci pescà

che nui inta geixia vegnimu 

tute e vote a rongrazià.

E sti veij burdigoti 

i conta ai nevi pecin 

u perchè i an faitu a geixia 

cu stu belu campanin.

In sce l'ura du tramuntu

cande u sù stà pè carà 

u gh'è passure e curumbi

chi te ven a saluà.

NINO ROLLERI