Versione desktop / mobile

RACCONTO SU BORDIGHERA: PAESENGHI MARINENGHI

Statistiche
     
 

 

PAESENGHI MARINENGHI....E CAICHE MUNTENEGRIN....IN TU MEZU...STORIE D'AUTRI TEMPI

 

Tanti ani fa .... parlamu in ti primi ani 50 du seculu pasau, mi eira pecin, e andava a scöra, a Vila Palmisi, che l'eira l'unico istitütu cu tegniva anche i esterni, cume se ciamava ina vota cheli chi  non eira in culegio, e paghendu  e muneghe i ne dava da mangià a mezugiurnu, sulu u primu, perchè u segundu se u duveimu purtà da cà in ta sacheta inseme ai libri.

Faitu su pecin preambulu, ve conteron cale l'eira u prublema che ciü me preocupava, durante u tragitu che tüti i giurni, da Muntenegro, duve nui stavimu, duvevu fa pe arivà a Vila Palmisi apuntu, a parte pasà davanti a cava in arzia duve ögni tantu i ne fermava pe sparà caiche mina, nu gh'eira prublemi, i arzienghi, i nu me dava fastidiu, u dificile u cumensava candu, f enia a muntà da Garnier, se arivava in tù paize veciu, non tantu a matin candu se andava, perchè gh'eira prublemi de urariu da rispetà, e tüti, aveimu cuita de arivà in tempu a scöra, perchè in cun e muneghe nu se schersava, e se ti arivavi in ritardu, ti te ne riturnavi a cà, in cun e cunseguense che ve lasciu imaginà ...

U difiçile l'eira u riturnu, candu de urari da rispetà nu ghe n'eira, e candu e bande di paisenghe e marinenghi, chi eira sempre in ghera, pe prublemi de teritorio, o ciü semplicemente per questiui campanilistiche e  de insufferensa recipruca i decideva de dase bataia, de solitu in ti giardin inturnu a purvereira, nui muntenegrin  che eirimu pochi e neutrali de solitu, duveimu sta lüstesu atenti, perchè se avevimu caiche amigu de ina banda, i aversari i ne cunsiderava nemighi e i sa piava anche cun nui ... e alura i eira cazin, specialmente pe mi che eira u ciü pecin, perchè lì oltre ae sciabule fae in cun e föie de parmura perae, i te recasava cun e prie de marina, e se ti eire de suta nu l'eira gairi alegra a facenda, e ciü de ina vota caicun u l'è ariva a ca sanghenendu, pe a noscia furtüna candu e bataie i eira in po tropu de suvente, e diemu anche im pò tropu rumuruze, e e arivava in te oureie a caiche paire o marie, o perchè caiche fiu u se arecampava a cà in cun a testa sçiapà, i fava intervegne Vitò a gardia, e in cu elu nu se schersava pe ren, oltre a sequestrà tüte e armi cuntundenti, su ne agantava caich'ün, vörava anche caiche testairun e causu in tu cü, e nu l'eira cume adesu, che se denusia tüti, a cheli tempi là se arivavimu a cà e diemu ai nosci veci che a gardia a n'aveva dau in causu in tu cü, l'eira següru che ne piaimu u dugiu da nosciu paire.

Stori de autri tempi, adesu  paisenghi e i marinenghi i nosci nevi i nu san mancu cose i sece, ma se vurei che ve dighe a verità nu so se l'è meiu adesu o ina vota, mi son andau a pei pe 5 ani da Muntenegru a Burdighea e da Burdighea Muntenegru, da sulu o cun di auti fieoi cume mi e candu on cumensau, nu aveva ancura 6 ani e nesciün ma mai dau fastidiu, a parte e ghere intestine pe u teritoriu che v'on apena cuntau e nu se  pensava mancu che caicün  purese falu, adesu, invece ....

Autri tempi autra gente de ina Burdighea, e de in mundu che a nu ghè ciüù.

SCROI  - persa ina lenga persu in populu -