E PREIXIUI

E scì a Burdighea in tempu gh'eira anche e preixui ... candu mi fiöò andavu schöra a Villa Palmisi e caravu tüti giurni da Muntenegru, ghe pasavu suta tüte e matin, e ciü de ina vota derè a chele fenestrete in cun e sbare surva a porta da Madarena, se vieva ina sciumbria che a se bulegava, e scì a preixiun a l'eira propriu surva a sa porta che i burdigoti i avava avertu in tu luntan 1780, e pe dì a verità, propriu in te in brütu postu a nu a l'eira, anche se sempre ina preixiun ...e devu dì che chelu bulegà in po' de impresciun u me fava mi che a cheli tempi nu avevu ancura deix'ani, pöi diventandu ciü grande su postu, candu e preixiu ormai e nu gh'eira ciü, l'eira in postu duve viese, candu se daimu i apuntamenti pe e scuribande, tante vote se dieva: "Duve se viemu ? Dae preixiui"... Ma andamu in belu pò ciüù inderè in tu tempu, candu e preixiui e funsiunava e aveva anche in gardian, cu se ciamava Pepin, e pagau da a cumüna de següru, oltre che fa a gardia ai prixiunei e se aregirava anche a l'uratoriu de San Bertumè, che a a preixiun u gh'è atacau, e u preixiunè de chelu tempu u s'eira acurtu che Pepin pe andà da a preixiun a l'oratorio u pasava da ina porteta, che nu l'aveva nexiüna ciavaüra, e ina bela vota che Pepin u nu ghe dava tantu da mente, in te catru e catrötu u l'è riusciu a scapaghe. Pasau in pò de tempu però, in amigu de Pepin che u l'aveva in tocu de tera a Muntenegru, in t'ina bela pusisiun e u ghe aveva fau in belu ortu de primisiee che pöi u se andava vende a Mentun, u l'eira andau a sercalu, e ghe aveva ditu: "Pepin garda che u toi preixiunè me parexe de averu vistu in se ina panchina de Mentun tütu mar imbelinau, e me sembra anche mortu da a fame e dau freidu". Alura Pepin u ghe dixe a su soi amigu: "Ben a proscima vota che ti vai a Mentun ti me u dì che vegnu anche mi cun tü".  Defati a vota dopu Pepin u và cun l'amigu  e u tröva u preixiunè veramente marandau, e tütu in t'in müiu  e alura u ghe dixe: "Sta a sente dame da mente a mì invece de stà chi cume in strasun a piate du freidu e a fa da fame, vegnitene cum mi returnitene in preixiun, aumancu là ti hai in teitu in se a testa, ina branda pe dorme e ti mangi teuti i giurni, e mi nu perdu u postu." E tüti dui inseme i se ne sun turnai a Burdighea ...  Forse sembra ina fora, ma ina fora nu l'è ... l'è ina storia vera de gente d'in mundu e de ina Burdighea che nu ghe son ciüù.

SCROI  - persa ina lenga persu in populu -