RACCONTO SU BORDIGHERA: LA PREDICA DI DON MARCO GASCIARINO, SANT'AMPELIO 2011

CARISCIMI BURDIGOTI, SEMU TURNA CHI

Cariscimi burdigoti,
Semu turna chi: u pà fuse seira e l'è pasau già in anu.
L'è propriu vera che u tempu u vöra. Me ven in mente in salmu cu dixe "O segnù, insegnane a cuntà i giurni e ariveremu a sagesa du cö".
Sci, candu vivemu ben, candu sercamu pe da bon u vurè du Segnù, alura anche se i ani i pasa u, nu se diventa veci e se pia parte a l'eternità, a chela vita cena de Grasia, e fà sempre növa da u Segnù.
U l'è su lì u segretu de tüti i Santi! Cuscì u nosciu Sant'Ampeiu, u se mantegne da mileseisentu ani sempre zuvenu. Imparamu anche nui u soi segretu.
Impareremu anche a godise cun güstu i giurni e teute chele cose bele, chi ne vegne daite da l'autu.
Avura ve dumandu scüza, ma cume in ti ani pasai, vurereva cuntà a Sant'Ampeiu, chelu che l'è sucesu in te su anu che l'è apena pasau...
L'è stau in anu cu n'à dau da fà.
A storia a nà purtau in se a buca de tüti.
Cheli chi eira in tà cumüna i l'han mandai tüti a cà, perchè i dixe chi nu fese gairi ben u soi travaiu. Mi nu digu ren in se chelu cu l'è capitau, de següru nu me fà gairi piaixè, ma besögna che se gardamu tüti ben, perchè anche in tu nosciu pecin gh'è caiche ren cu nu và.
Sulu candu ognün de nui fà ben u soi travaiu, e cose i pon andà avanti ben. A mugugnà semu tüti boi, ma a revertegase e maneghe e metighe u muru, pochi sun disposti a faru.
Speramu che chelu cu l'è sucesu u faghe sciorte caiche persuna zuvena brava ca vöie ben a noscia Burdighea, e che u a fase riturnà a l'unù du mundu cume a se meritereva.
In'autra cosa avemu fau in te su anu che l'è pasau: cume Te aveimu prumesu l'ürtima vota, se semu dai da fà pe arangià a tua geixeta, e avemu mesu inseme in pò de persune cumpetenti chi avese vöia de purtà avanti su da fà.
Avemu apena cumensau, ma chi ben cumensa u l'è già a metà de l'opera i dixe, e nui ghe credemu, anche perchè semu següri che Tü ti ne darai ina bela man, pe rende a tua cà ciü bela, e fane in angulu tranchilu duve puresene ritirà a pregà, e stasene in pò da suli in cu u Segnù, cume ti faixevi Tü ai toi tempi.
Ma e surprese e nu sun ancura fenie, in'autra cosa stamu preparandu pe l'anu che ven.
Ti sai u nosciu "Fratin" Padre Giacomo Viale, u festegerà i cent'ani du soi arivu in paradizu.
U nu nà ancura dau in segnu, ma nui burdigoti, semu teuti següri che in omu cuscì u nu pösce ese che in Santu, e cusci sercamu de pregaru tantu finchè su segnu u nu ne u muscie, alura, se ti peoi dane ina man anche Teu pe fà su miraculu te sarescimu tantu grati, e pe nui l'anu che ven sareva ancura cieù festa.
Ben ad ogni modu, pe sa ricurensa stamu pensandu a ina "Misiun". Ai Toi tempi, se cose i nu se faixeva, ma avù che de besögnu de rintisà in pò e braixe da fede.
Propriu in te se giurni chi de l'anu che ven, in belu grüpetu de frati, i vegneran a musciane cume ritruvà e strade chi ne purteran in cielu.
Sun següru che sa idea a Te piaixerà, e anche Tü ti te darai da fà pe agiutane a purtara avanti, e nui te purteremu föra cun tüta l'urna, e sarà turna festa granda ...
E cume l'aveva ditu S. Em. u Cardinale Siri "L'è vera che Ti sei riturnau chi perchè ti aixevi ancura tantu da fà ... e nui semu cuntenti e sercamu de lasciate fà ..."

Predica di Don Marco Gasciarino, parroco e abate, durante la messa il giorno di Sant' Ampelio del 2011 nella chiesetta omonima