RACCONTO SU BORDIGHERA: LA PREDICA DI DON MARCO GASCIARINO, SANT'AMPELIO DEL 2008

CARISCIMI BURDIGOTI E TUTI VUI CHE SEI CHI ANCOI

Sun propriu cuntentu de purè dì mi a mesa in sta geixeta cuscì cara a tanti, propiu u giurnu da festa du nosciu santu prutetù. Devu dì che nu sun abituau a predicà lezendu, ma ancoi nu posciu fa autrimenti! Già ve faron rie lezendu chelu c'on sercau de preparame e fame curegie, imaginamuse se andese a brasu… savei ben che nu sun bon a parlà u dialetu: nisceun me l'ha mai musciau e candu provu a dì caicheren, vegne in po da rie fina a mi. Candu sun entrau in parochia, però, in tu mei primu discursu avevu dïtu cu me sareva piaixü sercà d'imparà a parlalu: e ringraziu tuti cheli che, regordanduse de chelu c'on dumandau, i me parla in bordigotu e, faixendu finta de ren pe i strafalciui ca digu, i me lascia  dì caicoza leu stesu. Avura, on decisu de fa de tutu pe sercà d'imparalu ben, anche a custu de fa rie i autri (in fundu anche rie in po, in sti nostri giurni ciei de preocupasiui, nu fa gairi ma!): a pensu che besogna imparà a cunservà ben l'eredità che i nosci veci i n'an lasciau. In fundu, se ghe pensamu ben, duvemu davero tantu a chi u l'è vegnü prima de nui, e n'a lasciau tante cose bele, n'a testimuniau i valuri da vita, n'a tramandau a fede in Diu e in ta providenza. Nu se peò pensà de butà via u pasau: nui arivamu de lì, sun e raixi, è chelu cu n'a generau. Chi, cume in tu paise, teutu, anche e prie i parla: sun faite de storia e pe rispetale duvemu imparà a fa in po ciù de silenziu e lasciale parlà… Pensandu cuscì, me pa belu, propriu pe a festa de Sant'Ampeiu, fa caicosa pè mantegnì vive e tradiziui, anche inventandune de növe cume sta chi de dì a Mesa chi, au despuzernà, cu a predica in dialetu.  Sei vegnui chi, speru, nu sulu pe sentì cume parlu e cose digu, ma prima de teutu pe regordase du nosciu Sant'Ampeiu che chi u l'è vegnü ciù de milesinchesentu agni fa, e chi u l'ha decisu de ciantà tanta semensa: e nun sulu de parmure, ma priman'cù chela da fede, de l'amù, e de l'agiutu reciproco. Duvemu cuscì cumensà a ringrazià u Segnù cu n'a daitu in santu cu l'è pe tuti in mudelu da imità e cu ne prutege e u prega u Segnù anche pe nui. Prima de finì, se vuremu dumandà chi sun sti santi che pregamu e gardamu: se i sun vixini o luntan da noscia vita; se puremu anche nui pruvà a metise in sce e sue urme  pe divetalu cian cianin, anche nui o se ghe duvemu rinunzià in partenza!  Candu parlu cui fioj, me dixe che i santi sun cheli c'an faitu in muiu de cose bone, chi sun stai cuisci bravi da nu fa ciù pecai.  U pureva ese anche vera ma famu atenziun a nu scangià i santi pe i eroi. Mi a pensu tante vote che s'i ne purese ancù parlà, ne cuntereva sulu chelu c'u l'a fau u Segnù in ta soi vita ... e i ne direva, convinti, ch'eli i nu son ren!!! Ne direva ch'eli i se sente cuscì poveri e pecin, cuscì cun tanti pecai che nu ghe resta autru che metise in te mae da grandixima misericodia du Segnù. Alura stu chi u l'è u pensieru c'a ve voiu lascià ancoi: Santi nun sulu puremu esilu, ma duvemu fa de teutu pe diventalu. E tütu chelu che nui purem fa è arendise, per lascià cu sceè u Spiritu Santu a scangiane u cö, a dane a forsa de fa du ben, a vièe cali son e cose  ciù importanti da fa. Curagio Burdigoti, gardamu sant'Ampeiu e damuse da fa a lasciàmu travaià u Segnu in ta noscia vita: Burdighea a serà ancùn ciüù bela, cena de sciure profumae, e cena de boi fruti. …e grazie p'a pazienza c'avei avuu.

Paire nosciu, che ti sei in Cielu,

tuti i omi te ricunusce cume Diu( Segnù)

Che u toi Regnu u vegne,

che a tua voluntà sece faita in cielu e in scià tera.

Dane ancöi u pan cu ne serve

E perduna i nosci pecai, cume nui perdunamu a chi n'a faitu du ma.

Fa che nu cageimu in ta tentaziun, e liberane dau Ma. Cuscì sece!

Predica di Don MARCO GASCIARINO, parroco e abate, durante la messa il giorno  di Sant' Ampelio del 2008 nella chiesetta omonima