ME SUN RIMESU A REGATA'

Dopu in pò de tempo, ma pöi nu ciüù de tantu, me son rimesu a regatà, e alura vui direi ma a nui nu l'è che sa nutisia a ne scange a vita, se ti hai ripiau a regatà bon pè tü …. Avei raixiun ma se avei veoia de stame a sente ve conteron lù stesu sa storia, che in fin de i conti tantu storia a nu l'è. Pe aregurdà un di ciù bravi velisti che avemu avùu da nosce parti, un di dui club, che ghe in tu portu de Burdighea, i urganisa tüti i ani u trufeo Marinelli, e mi a bordu de ina barca de in amigu, cume dieva prima g'hon piau parte, üna de due regate, partendu da Burdighea, se va a girà davanti a Murtura pe pöi riturnasene inderè a l'arivu sempre a Burdighea. Ben mi sa trata de marina nu l'è che sece a prima vota che a fasu, ma su giurnu l'ì, nu s'ò cose dive sarà stau perché eiru cuntentu de returnà in se ina barca a vera sarà perché eirimu in ta marina pe aregurdà in caru amigu, che seguramte u continuerà a regatà in te de autre marine, duve u ventu ul'è sempre bon e a marina carma, sarà perché a marina a se abunasà e nui semu arestai fermi, propriu davanti a u forte de l'Anunsiata, e candu on aisau i oii e me paresciu davanti sa furtesa in se sa roca, me vegneuu in mente candu da fiieoi lezeimu e storie di cursari, chi mensiunava Ventemia, e me imaginava de viè e buche di canui e viè e nivure de fümo sciciorte prima de sente u corpu e de viè u sprüsu d'aiga aisase da vexin a a nave, e mi de ese in se sa nave che al'andava a l'atacu du forte, duve u malvagiu u tegneva preisgiunè a dona che a m'aveva piau u cö, ma peoi, cianin cianin u ventu u l'à repiau, e u ma desciau da su sognu e andando avanti le cumparia a catedrale in cun su campanin impunente credeime son restau sensa sciau, e sempre cianin cianin a fuixe du Roia, fin a arivà a u Nervia, e l'ì nu ve digu, sa macia de verde che sembra ca sciorte din ta marina, e se aisai i oii, ma duvei faru lentamente e muntà sciù sciù, ma cian cian e arivai fin a viè e noscie bele muntagne, e me vegneuu in mente i nosci veci, chi e fava vive, e vece mulatiere, e strade du sà, i müratei in cun se fire de müre, che fin a pocu cieù de sent'ani fà fintantu chi nun han avertu a galeria de Tenda i eira l'unicu mezu de trasportu pè fà cumerciu in cun u Piemunte. E, sempre, in cun chelu pocu ventu che gh'eira vegnendu avanti teuta a costa ascaixi drita, fin a punta de sant'Ampeiu, prima Valecreosia e peoi a spiagia de Burdighea davanti a Borgo Marina cume vegniva ciamau in tempu, Burdighea basa duve sempre tantu tempu inderè i cumandanti di leudi chi fava i cumerci in cun e izule e a basa Italia i vegniva a caregà e scaregà i soi bateli fin in se l'asa, duve fin prima chi fese u portu vegniva  tirai teuti i bateli di pescaui chi carava din tu paise veciu, i stendeva e re in se a pasegiata pe fare ascieügà e chixire se e eira stae sgarae da caiche agantu, bè de segeüru a cheli tempi tante gabine palafitte barache e barachete in se l'asa de següru i nun gh'eira, ma lasciamughe gerbu, su chi le in tastu che le meiu nun tucà s'autrimenti me fasu sulu vegnì ma de steomegu....

Ben me fermu chi perchè se nu me vegne u magun a mi e sonu a vui, ma credeime cun teutu  chelu che ancheoi on vistu sun stau propriu cuntentu de esime rimesu a regatà....

SCROI  - persa ina lenga persu in populu -