RACCONTO SU BORDIGHERA: LA PREDICA DI DON MARCO GASCIARINO, SANT'AMPELIO 2009

CARISCIMI BURDIGOTI

Cariscimi burdigoti,
Anche st'anu semu chi pe fa festa au nosciu Sant'Ampeiu e mete in te sue mae tüta a noscia vita e dumandaghe de gardà de lasciüù u nosciu paize Burdighea, e noscie famije: fieoii, zuveni, veci, maroti e tüti i burdigoti che i sun pe u mundu.
U l'è belu savè che u nosciu Santu ne garda dau cielu e u ne muscia - se ghe damu a mente - u camin da fa, in camin ch'elu u l'ha fau prima de nui, in ti ani da soi vita e cun u so vurè.
Alura me ven in mente chelu cu se conta d'i fati da vita du nosciu prutetù, cume u l'age vosciü vive tütu e sulu pe u Segnù, tegnendu luntan e tentasiui.
Me piaixe pensà Sant'Ampeiu zuvenu, in ta sua bitega de ferà, tütu piau nun sulu dau travaiu, i feri da picà e ciegà, ma anche atentu a e genti ch'i vegneva a dumandaghe in cunseiu o a sercà anche sulu ina parola bona.
U vegu pöi inzenuiun in t'in recantu cu prega, e, sulu c'u so Segnù, godise a paixe e a beleza de cose, pensandu au tempu che pasa e a vita da spende a cercà de fa du ben pe truvà u veru ben.
Gardu pöi i schöi chi de föra e me pa de vieghe u nosciu Santu, veciu, segnau da a vita e cegau da u tempu, cume chelu feru che elu pe tanti ani u l'ha travaiau in ta braixa ruvente, ma che, ina vota forgiau u l'è diventau tenace e forte, e u nu se ciega ciù.
Ampeiu u s'è lasciau scaudà a longu in sciu fögu de l'amù du Segnù e picà dae martelae d'a vuluntà divina fin a diventà santu.
Cume sareva importante anche pe nui imparà sa leziun dau noxiu Sant'Ampeiu. E nun sulu sa chi!
U savei chelu c'u l'ha fau candu l'è stau tentau, cume u l'è stau pruntu a pià dau fögu, a mae nüe, in feru cu stava tavaiandu, pe fa scapà u diavu che in furma d'ina bela dona u tentava.
E tentaziui fan parte da vita, d'in tempu, cume d'anch'öi, e nu l'è sulu a tentasiun da carne, cume se dieva in tempu, ma de tütu chelu cu n'aluntana da a vuluntà du Segnù. Pensamu cante tentaziui anche ai nosci giurni e tenta de rumpe e famije, de purtà i zuveni pe di brüti camin, de credise de purè fa tütu da suli senza u Segnù, de ese forti sulu perchè se han due sodi in ta staca, ...
E tentaziui sun pröve che bezögna superà, faghendu sempre ben atenziun a nu cage e fase ma. Nui truvamu mile scuze, se brandamu de chi e de là in cun ina vita che - diemu nui - a nu fa ma a nexiün. Ma dumandamuse se aumancu famu du ben! Pensamu de metise u cö in paixe diendu "Semu omi" - i u dixe anche e done - pe fa intende che nu puremu pretende tropu da nui meiximi: Sant'Ampeiu ne direva che se sbaiamu perché nu semu ciù omi, ma santi! Duvemu sulu imparà che da suli nu puremu fa ninte (cuscì u dixe u Segnù) ma che tütu l'è puscibile a chi u crede in Elu.
Ve regordai a tentaziun de Sant'Ampeiu? Elu sübitu l'ha cacià luntan cun a forza da soi fede: ma sa forza l'aixeiva perchè a soi vita de tüt'i giurni a l'eira fà de preghiere, penitenze e i digiüi, e salì l'eira a soi regula.
Senza nexiüna regula nu se và da nexiuna parte: anche pe a ghera contru u ma duvemu ese preparai e aveghè e armi ciù bone. E chelu che n'aspeita sarà cume chelu c'u l'è capitau a Sant'Ampeiu: dopu cu l'a caciau luntan a tentaziun, da chela vota, se dixe c'u piese i feri ruventi cu e mae, senza bruixase. A tentaziun candu savemu afruntala cu a Grazia du Segnù ne lascia ina forsa ca supera tüte e forse di omi; candu se lascia entrà u Segnù in ta noxia vita, ne vegne daita ina forsa ben ciüù forte de cantu po fa in omu.
Cari Burdigoti, ese chi ancöi serve a pocu se nu vuremu pruvà a vive cume piaixe au Segnù, pe ese anche nui Santi! Duvemu dase da fà inseme, cercà de fa du noxiu meju pe capì a voluntà du Segnù e fara!
U Segnù n'a lasciau se steso in tu Sacramentu da Mesa: u l'è u tesoro ciù grande c'avemu. Gardamu ben de nu faselu raubà cume e reliquie du Santu: pe avelu inderè ne tuchereva aspeità anche a nui tantu tempu e sareva ina suferensa.
Cariscimi, sun cuntentu che anche st'anu ghe l'avemu fa a festegià u noxiu Sant'Ampeiu.
Vöiu ringrazià tüti cheli chi se sun dai da turnu pe fà in modu che sa giurnà e vegnese ben pe tüti : auturità, pescaui, paruchiai, forse de l'urdine l'aministrasiun tüta .. vuluntari u risveiu burdigotu e tüti cheli che de seghüru me sun scurdau, anche perchè anchöi a giurnà a l'è sta longa ...
Ma nu l'è ancura fenia: se truvamu ciüù tardi tüti in se u cavu pe beve mgari ina vota inseme gardase i föghi e sentì i boti, e ghe scumetu che in tu mesu a tüta sa gente ghe sarà anche Ampè e u sarà cuntentu viendu che i burdigoti anche dopumilanta ani i se regorda ancura de Elu.
 

Predica di Don MARCO GASCIARINO, parroco e abate, durante la messa il giorno  di Sant' Ampelio del 2009 nella chiesetta omonima