A FESTA DA MAMA

Chissà cose u pensereva anch'oi, su ghe fuse anc'ura l'alura scendegu de Burdighea, Senatu Raul Zaccari, candu vutau da tutut u cunsei comunale du 7 avrì 1956 i an decisu de purtà in Italia a festa da mama? Mi pensu che cume minimu u l'arestereva in pò stupiu acurgenduse che dopu pocu ciù de sincant'ani, da festa da mama sareva arestau cusci pocu. Forse cheli chi pensa (de pensà) pe nui i an decisu che a mama a nu duvese ese ciuù de moda. O forse i pensa che de mame zuvene da pureghe regalà in telefunin o in computer che ne sece tropu poche. E alura ghe sareva tropu pocu cumerciu, e quindi le meiu che a gente da a mama a nu se ne aregorde ciuù. Ben mi invece me ne aregordu, e pensu tanti autri cume mi i se aregorde candu fijoi i ne purtava au cinema teatru Zeni duve i ne faisgieva cantà a cansun da a mama e peoi i premiava i fijoi ciuù bravi, cheli chi aveva scritu e puesie o i pensierin ciuù beli, sempre dedicai a a mama. me aregordo candu a mama se ghe regalava de sciure, e au mancu se dava du cumerciu a gente de nosce parti, o ina scatura de ciculatin, magara in cun a speransa che caicun peoi u riturnese in te noscie tasche. Vistu anche che a cheli tempi nu l'è che de ciculata ne girese peoi tanta. Adesu invece sembra che e mame e faghe sulu nutisia candu dai fijoi e sun picae o magara amasae. E dighe a  a mama te vueiu ben, sembra ina cosa da vergeognasene. ben mi credu invece che semu ancura in tanti che se aregurdamu da mama e che cuntinueremu a dighe te vueiu ben, anche se a l'è già in cielu e cuntinueremu a regalaghe ina sciura o ina scatura de ciculatin, in cun a speransa magara riturnandu in pò fijoi che caicun a ne u regale ancù anche a nui.

SCROI  - persa ina lenga persu in populu -