Versione desktop / mobile

RACCONTO SU BORDIGHERA: LA PREDICA DI DON MARCO GASCIARINO, SANT'AMPELIO 2010

     
 

 

CARISCIMI BURDIGOTI, ANCHE ST'ANU

 

Cariscimi burdigoti,
anche st'anu se atruvamu chi, in ta geixeta du nosciu Santu prutetù, pe finì i festegiamenti: in te su postu cuscì cien de storia e d'emuziui mandamu a Sant'Ampeiu e nosce urasiui e turnamu a mete in te sue mae u nosciu paise e tute e dumande e i besögni dei nui soi devoti.
Se nu ve pia ma, però, sta vota, au postu de fa a predica a vui, me piaixereva parlà in po' cu u nosciu santu pe cuntaghe cume i van e cose da se parti.
Cariscimi burdigoti,
anche st'anu se atruvamu chi, in ta geixeta du nosciu santu prutetu, pe finì i festegiamenti: in te su lögu cuscì cien de storia e d'emuziui, elevamu a Sant'Ampeiu e nosce preghiere e turnamu a mete in te sue mae u nosciu paise e tute e dumande e i besögni dei nui devoti.
Se nu ve pia ma, però, sta vota, au postu de fa a predica a vui, me piaixereva parlà in po' cu u nosciu santu pe cuntaghe cume i van e cose da se parti.
Cariscimu Sant'Ampeiu,
Ti hai vistu cose amu fau stanu? semu riuscii a fa ina nuvena e propriu chi, in te sa geixa che a porta u toi nome. U nu l'è stau tantu facile, ma puremu ese cuntenti! U ghe stau chi u s'è lamentau perché - e u l'ha mugugnau --"u s'è sempre fau cuscì e avura i scangia tütu". Caicun autru, lesendu u manifesto cu u prugrama, u l'a diitu se se semu bevüi u servelu pe mete tute se preghiere. Anche in sciu giurnale gheira scriitu: A Sant'Ampeiu messe e rosari teutu u giurnu!
Forse u ghe chi crede che pregà tropu sece ina marutia!
Ma nui nu se semu genai cieùe de tantu e semu andai avanti.
E se gardamu ben, a parte sti chi che nu ghe va mai ben ren e teutu serve sulu pe purè mugugnà, e cheli ch'i sun boi a regordase de teu sulu pe i föghi e u festin. Duvemu dì che, pe ese a prima vota, a l'è andà ben! Puremu ese cuntenti: ghe stau chi l'a savü i urtimi giurni, che u s'è fau genà da l'aiga e dau freidu, e chi, pe e gambe mole nu ghe l'a fà a carà fin chi, ma ghe stau anche chi l'a decisu de desciase prestu a matin o sciorte a a seira e u s'è recampau per partecià a Mesa, cantà e laudi e sentì e bele riflesiui du Paire Gualberto.
Pe a Mesa d'a matin e a preghiera da seira ne sun arivai de tüte e mene: zuveni e veci, gente ch'i travaia e persune in vacanza, burdigoti e furesti. E tuti semu andai via alegri e cuntenti.
Mi nu l'avereva dïtu, e ancù de ciù de mi i aiutri ch'i m'agiuta, che sarescimu stai in cuscì tanti a isase presto a matin pe vegne a nustra geixeta. Sci, i burdigoti se cumensa a descià! U lìè in bon segnu.
Pensu che candu diemu che besögnereva desciase in po, duveremu intendila cuscì: turnà a cumensà tütu da u Segnù, metilu prima de tüte e autre cose. Speramu d'avè imparau au mancu caiche ren ???
Pe mi u l'è stau anche belu carà a pei tüte e matin e fa sti catru pasi in tu mezu ai pin: in cun e nivure, o u su cu nasce, l'aria fresca a marina, i erburi e sciure, tütu u me parlava d'a beleza che u Segnù u n'ha vuscieuu regalà.
Pöi arivavu chi e me piava ma: ma viei cume a l'è marmesa sta geixa? Cupi sciapai, zine in ti muri, fi ch'i pende de chi e de la .... a campana c'a nu sona ciù, u portegu che candu ciove o i l'aiga i giardin u se ence d'aiga, e se ti vai suta pe riparate a testa ti te bagni i pei... e sareva ancù ren!
Candu entru me vegne in futun a viè canti cioi i han ciantau in te sti ani tra ina pria e l'autra . Sun cheli chi mete e sciure pe i spusi e vistu che, i dixe, i se maria ina vota sula (speramu u sece proprio cusci, perché ti sai, i tempi pa ch'i scange) pe fa caicousa chi pensa u sece cieù straurdinariu, i nu ghe van mai ben cheli che ghe e i cuntigna a ciantane sempre d'i növi.
On dovü cuscì dì de ciantara l'ì d'atacà cumpusiziu ai muri e pe levà a tentaziun on comenzau a levà tüti i cioi: e n'on fau gia de bele manae e nu l'o ancùn feniu.
Ma fandu su travaiu on truvau in'autra novità: u simen - ciamamulo cuscì - c'u tegne inseme e prie, u se derfa cume farina e ghe sun de prie ch'i locia che l'è in piaixè !!!
Candu pöi u sciuscia u levante, segundu duve ti sei, ti te pii d'i corpi d'aria anche se barcui e finestre nu ghe ne sun prorpio macu euna ... tra e prie, se ve, ca a causina l'è mangià u sarin, e u ventu u se ghe infira che lìè in piaixè.
Sci, sant'Ampeiu, a toi geixa, c'a l'è in sibolo de Burdighea, a l'è marmesa.
E u sareva in veru pecau se, ina de se matine, ne atruvascimu sulu in müiu de causinasi.
Ma pensandughe ben n'u pösciu crede che tü nu ti gh'agi fau casu! E che nu ti agi pensau ren pe fa in modu de faghe mete man e fala riturnà a l'unù du mundu!
E alura - me digu - perché ti a lasci andà cuscì? Cante persune in te si giurni son pasae pe ve a cripta e dì ina preghiera, cante i ghe lascia u cö o i sogna de mariaseghe, cante i se porta u regordo de su postu meraviglusu...
Besogna fa caicousa pe tegne ben cà toa ...
Ma, se capisciu ben, ti ne vöi dì c'u nu basta arangià a geixa de prie: a ghe prima in'autra geixa che a va arangià , chela d'i omi! Sci, e prie semu nui e se nu se lasciamu ligà eun cun l'autru dau u çimen d'u spiritu de l'amù che u Segnu ne dà, se sbrenegamu cume e prie de armaleu. Se nu a ciantamu l'ì de ciantà de cioi e fa di sgarbi, chi sun i nosci pecai, i ciapeti, , i dispeiti e nosce mancanze de ben... finimu mà tüti.
Besögna dase recatu, imparà da bon a pregà e pregà ben che chelu che gh'è de bun in ta noscia vita, u vaghe a bon fin. Inutile tegne in pei meuri e tradiziui. Semu nui che duvemu pe primi sta ben driti e in pei.
Alura, Sant'Ampeiu benedetu, te dumando, a nome de nui che semu chi ancöi e pe tüti burdigoti:e furesti ... dane ina man a descröve a beleza de chela geixa che semu nui candu semu inseme e andamu d'acordiu.
Agieutine a diventà santi cun tute e nosce forze e a tirà sciù ina geixa ancù ciù grosa e bela: a noscia comunità. Alura anche tü, chi, ti te darai da fa cume ti ai sempre fau, a mantegne bela sa tua cà chi in terra.
Te ringraziamu e te vuremu dì cu a noscia preghiera che te vuremu ben:e te dumandamu de nu stà mai aluntanà da nui e tue mae ch'i ne benedixe. Grasie.

Predica di Don Marco Gasciarino, parroco e abate, durante la messa il giorno di Sant' Ampelio del 2010 nella chiesetta omonima